كتب: د.حافظ الزين
لو كان صمود خيل الوجع محسوب
ماكان نكرك ضلك
ما كان فاتك ضلك
في جذر اتنين مضروب
ما كان فارقت ليل السماح نجيماتو
وخلت عصب الفرح معطوب
في البحر الشارد يا قيف
الموجة مابية تذوب
الأماني ترقص كيف
في المراسي النازفة خطوب
يا حارس القمرة
اصلو القدر مكتوب
حبيبتك السمرة
جدار روحك المثقوب
جاياكا يوم بكرة وضرع الامل محلوب
يا واقف براك مشروق
والحتة فيها خلوق
سرقك غناك يازين سرقوك من العين
الواقفة شمال ما جات بيمينك
يا هدير الصمت وينك؟
يا صهيل خيول العزة وينك؟
حجت قصايد الصبر
ما شفعت ليك قرابينك
حط في الكلمة نون ادي الصورة اطارها
ادي القافلة مسارها
البت الساكتة ظنون حدك نقطة ولون
يا سيد الضرا المغبون
ما تقفل عليك الباب
امرق من شرايينك
وانفض مواعينك
وكسر زنازينك
لسه الزمن كضاب
ضي النجيمة ما غاب
الجاية من الله كيف يفيدها حجاب
سددت دينك كيف
والصفحة فيها حساب
رميتو سهمك وين
سهم شقاكا اصاب
خاطر العوافي مصاب
جوات قلوبنا عتاب
رغم العذاب والصي
ادوك علاجك كي
ارقد علي السيداب
ماقالوا صوتك ني
اللافتة بعد الباب
الشال الاماني منو
لسه السفر ديداب
سلام بيوت الطين
ما نادت دروبنا السراب
من المنصة الثقافية الثورية للمجلس الاستشاري للقائد العام لقوات الدعم السريع.
